Labels

Thursday, April 17, 2014

MAMA ATELEKEZA MTOTO MCHANGA MWENYE UMRI WA MWEZI MMOJA



Jeshi la Polisi mkoa wa Kinondoni jijini Dar es Salaam, linaendesha msako mkali wa kumtafuta Mama mzazi aliyetelekeza mtoto mchanga mwenye umri wa mwezi mmoja (hana jina), na kuokotwa na wasamaria wema katika Kata ya Bunju A, Wilaya ya Kinondoni jijini humo. 

                  Mtoto aliyetelekezwa na mwanamke huyo

Kamanda wa Polisi mkoa wa Kinondoni ACP, Camillius Wambura, amethibitisha kutokea kwa tukio hilo ambapo amesema uchunguzi wa tukio hilo bado unaendelea ikiwa ni pamoja na kumtafuta mama mzazi wa mtoto huo.

Tukio hilo limetokea Aprili 16, mwaka huu, ambapo wasamaria wema walifanikiwa kumuokoa mtoto huyo kisha kumpeleka katika kituo kidogo cha Polisi kilichopo Bunju A, na baadaye alihamishiwa katika kituo cha Polisi cha Wazo, ambapo pia ilikutwa barua aliyoiandika mama wa mtoto huyo ikiwa karibu na mtoto huo.

Aidha, aliandika barua yenye maelezo mafupi yanayoelezea maisha yake, huku akielekeza lawama kwa mzazi mwenzake ambaye hakumtaja jina kuwa amemtelekeza muda mrefu bila kumpatia mahitaji muhimu kabla ya mtoto huyo kuzaliwa, hali iliyomlazimu kuchukua uamuzi wa kumtelekeza mtoto huyo.

             Hii ndi barua ilioachwa na mama mzazi wa mtoto huyo


Ripoti ya utafiti uliofanywa na Chama cha Wanahabari Wanawake Tanzania (Tamwa) katika mikoa 18 ya Tanzania Bara na Visiwani umebaini kuendelea kushamiri kwa vitendo hivyo huku matukio 996 ya udhalilishaji yaliripotiwa kutokea katika wilaya sita za Zanzibar.

Kati ya matukio hayo, 242 yalihusu ubakaji, vipigo vilikuwa 388, ndoa za utotoni 42, kutelekezwa 96, mimba za utotoni 228, ambapo kwa upande wa Tanzania Bara ukionyesha kuwa Wilaya ya Babati mkoani Manyara inaongoza ikiwa na matukio 132.

Ripoti ya Utafiti wa Ukatili dhidi ya Watoto Tanzania, iliyotolewa na serikali pamoja na Shirika la Kimataifa la Kuhudumia Watoto (Unicef) mwaka 2011, ilidhihirisha kuwa msichana mmoja kati ya watatu na mvulana mmoja kati ya saba nchini Tanzania hukumbwa na unyanyasaji wa kijinsia kabla ya kufikisha umri wa miaka 18.


MFANYABIASHARA MJINI TUNDUMA AUWAWA KIKATILI KWA KUCHOMWA NA KISU.



 TAARIFA YA JESHI LA POLISI MKOA WA MBEYA

MTU MMOJA ALIYEFAHAMIKA KWA JINA LA PETTER MWAMBENE (38) MFANYABIASHARA WA KUBADILISHA FEDHA KIENYEJI, MKAZI WA KALOLENI – TUNDUMA WILAYA YA MOMBA AMEUAWA KWA KUCHOMWA KISU KICHWANI NA KISOGONI NA WATU WASIOFAHAMIKA.

KWA MUJIBU WA KAMANDA WA POLISI MKOA WA MBEYA SACP AHMED MSANGI, TUKIO HILO LIMETOKEA KATIKA MTAA WA KALOLENI, KATA NA TARAFA YA TUNDUMA, WILAYA YA MOMBA MNAMO TAREHE 16.04.2014 MAJIRA YA SAA 20:00 USIKU.

WATU HAO KABLA YA KUFANYA TUKIO HILO WALIMVIZIA MAREHEMU NJIANI KATIKA UCHOCHORO WAKATI ANARUDI NYUMBANI AKIWA UMBALI WA MITA CHACHE KABLA YA KUFIKA KWAKE NA KUMVAMIA KISHA KUMSHAMBULIA.

AIDHA INADAIWA KUWA MAREHEMU BAADA YA KUPEKULIWA KATIKA MIFUKO YAKE ALIKUTWA NA KIASI CHA FEDHA DOLA ZA KIMAREKANI 1,460.

MSAKO MKALI UNAFANYWA NA ASKARI WA TUNDUMA – TANZANIA KWA KUSHIRIKIANA NA ASKARI WA NAKONDE – ZAMBIA ILI KUWABAINI NA KUWAKAMATA WALIOHUSIKA NA TUKIO HILI.

KAMANDA WA POLISI MKOA WA MBEYA KAMISHNA MSAIDIZI MWANDAMIZI WA POLISI AHMEDI Z. MSANGI ANATOA WITO KWA YEYOTE MWENYE TAARIFA JUU YA ALIYEHUSIKA NA TUKIO HILO AZITOA KATIKA MAMLAKA HUSIKA ILI AKAMATWE/WAKAMATWE  NA HATUA ZA KISHERIA ZICHUKULIWE DHIDI YAKE.

KATIKA TUKIO JINGINE, MWANAFUNZI WA DARASA LA TANO KATIKA SHULE YA MSINGI IKUTI JIJINI MBEYA ALIYEFAHAMIKA KWA JINA LA HAPPY SAMSON (12) AMEFARIKI DUNIA PAPO HAPO BAADA YA KUGONGWA NA GARI LENYE NAMBA ZA USAJILI T.766 ADJ AINA YA TOYOTA LAND CRUISER LILILOKUWA LIKIENDESHWA NA EDWARD MOSES.

AJALI HIYO IMETOKEA MNAMO TAREHE 16.04.2014 MAJIRA YA SAA 16:00 JIONI HUKO KATIKA ENEO LA IYUNGA, , JIJINI MBEYA, JESHI LA POLISI LINAMSHIKILIA DEREVA WA GARI HIYO NA CHANZO CHA AJALI BADO KINACHUNGUZWA.

KAMANDA WA POLISI MKOA WA MBEYA KAMISHNA MSAIDIZI MWANDAMIZI WA POLISI AHMEDI Z. MSANGI ANATOA WITO MADEREVA KUZINGATIA SHERIA NA ALAMA ZA USALAMA BARABARANI WANAPOTUMIA VYOMBO VYA MOTO ILI KUEPUKA AJALI ZINAZOWEZA KUEPUKIKA. AIDHA ANATOA WITO KWA WATUMIAJI WENGINE WA BARABARA KUZINGATIA SHERIA NA ALAMA ZA BARABARANI IKIWA NI PAMOJA NA KUVUKA SEHEMU YENYE VIVUKO [ZEBRA CROSSING] ILI KUEPUKA AJALI.

KATIKA HATUA NYINGINE, JESHI LA POLISI MKOA WA MBEYA LINAWASHIKILIA WATU WATANO AMBAO NI HURUMA LWANJI (27) MFANYABIASHARA , BETTY EVOD (19) , YOHANA BENEDICTO (27) WOTE WAKAZI WA KIJIJI CHA MWAOGA,  NEEMA MWANDOLELA (26) NA PATRICIA MWANDANJI (35) WOTE WAKAZI WA KIJIJI CHA MAMBA WAKIWA NA POMBE KALI ZILIZOPIGWA MARUFUKU NA SERIKALI.

WATUHUMIWA HAO WALIKAMATWA KATIKA MSAKO ULIOENDESHWA NA JESHI LA POLISI MNAMO TAREHE 16.04.2014 MAJIRA YA KUANZIA SAA 17:30 HADI SAA 18:15 JIONI HUKO KATIKA VIJIJI VYA MWAOGA NA MAMBA, , WILAYA CHUNYA, WAKIWA NA POMBE HIZO AMBAZO NI RIDDER PAKETI 139, DOUBLE PUNCH PAKETI 42, CHARGER PAKETI 02 NA BOSS WHISKY PAKETI 31.

TARATIBU ZA KUWAFIKISHA MAHAKAMANI WATUHUMIWA ZINAENDELEA.

KAMANDA WA POLISI MKOA WA MBEYA KAMISHNA MSAIDIZI MWANDAMIZI WA POLISI AHMEDI Z. MSANGI ANATOA WITO KWA WAFANYABIASHARA KUACHA MARA MOJA KUJIHUSISHA NA UUZAJI/USAMBAZAJI WA BIDHAA ZILIZOPIGWA MARUFUKU NA SERIKALI KWANI KINYUME CHA SHERIA NA NI HATARI KWA AFYA YA MTUMIAJI. AIDHA ANAENDELEA KUTOA WITO KWA WANANCHI KUTOA TAARIFA KATIKA MAMLAKA HUSIKA ZA MTU/WATU WANAOJIHUSISHA NA UUZAJI/USAMBAZAJI WA BIDHAA HIZO ILI WAKAMATWE NA HATUA KALI ZA KISHERIA ZICHUKULIWE DHIDI YAO.



Tuesday, April 15, 2014

Papaa On Tuesday.....Heri Mvua Ikanyesha Ukajua Wapi Panavuja

Tunakila sababu ya kumshukuru Mungu kwa ajili ya Siku ya leo na uzima aliotupa mimi na wewe tunapoelekea kuhitimisha majira haya ya Pasaka na tukiwa tayari kwa ajili ya kusheherekea kufufuka kwa Bwana wetu Yesu Kristo.


Mbali na yote tunakila Sababu pia sisi kama Watanzania kumshukuru Mungu kwa ajili ya Kupatika kwa Hati ya Muungano ambayo kwa Miaka 50 imekuwa ikisadikika kuwa haipo kumbe ipo Ikulu kwenye makabati kabati nalo ni jambo la kumshuuru Mungu ni matumaini yangu kuwa sasa majadiliano kuhusiana na Muungano kule Bungeni yatafikia muafaka lakini isije kuwa kuwa kupatikana kwa hati ya Muungano ni Kuziba shimo la Panya kwa kipande cha Kitumbua tukiamini Panya wa Kero za Muungano hata tusumbua tena tatizo la Panya ataanza kula kitumbua pole pole tukija kustuka kumbe tulitumia tiba ya muda kwa gonjwa sugu.
Kwa siku kama 4 wakazi wa Jiji la Dar-es-Salaam na vitongoji vyake wamekuwa wakiishi kwa mashaka sana kutokana na mvua zinazoendelea kunyesha, kuna watu wamepoteza makazi, kuna watu wamepoteza ndugu, kuna barabara zimeharibika, kuna nyumba zimejaza maji, kuna madaraja yamekatika, kuna madaraja yamepata nyufa hii yote ni kazi ya Mvua. Kuna watu walihamia maeneo ambayo hawakujua nyakati za Mvua huwa kunafananaje wengine wamejenga maeneo hayo na kuna wengine wamepangishwa maeneo hayo yanaweza kuwa ya makazi ama biashara mwisho wa siku wamekuja pata picha halisi kuyafahamu mambo yaliyofichika. Kila jambo linalotokea na kulitazama inategemea sana na angle uliyokaa na kulitazama jambo hilo. Mfano inawezekana kabisa kukosa Bunge la Katiba watu kuongea kuhusu hati ya Muungano yamkini mpaka leo isingepatikana, pengine kupitia mvua zilizonyesha wangeni walisafiri kwa siri matokeo yake kubomoka kwa madaraja kukasababisha wajisalimishe kwa wapenzi wao kila jambo linalotokea basi kuna somo la kujifunza ndio maana ninasema ni heri Mvua ikanyesha Ukajua wapi panavuja.

Mgonjwa anapokuwa anaumwa na ukawa na kazi ya kuuguza kuna mambo ya kujifunza kuna wanaokuja kumuona mgonjwa, kuna wanamuuguza mgonjwa, kuna wanaokuja kumuonea huruma mgonjwa na kuna wanaokwenda kupata habari tu za mgonjwa na mambo mengi kama hayo. Jambo hili ni hata kwa wanaopatwa na mafuriko sio kila mtu anayekwenda anaenda toa msaada.Watu wanapokuwa wakija hospitalini ni wengi sana sana na wengine kuwa nani ni nani pia walikuwa wamefahamiana hapo, marafiki waliokuwa hajaonana muda mrefu walikutana hapo. Kuna waliokuja wakacheka, kuna waliokuja wakarudi na maswali mengiiii, kuna walikuja wakatoka na majibu ya maswali yao mengiii, kuna waliokuja na kuliaaa lakini mwisho wa siku nikasema kupitia kuugua  “Heri Mvua inyeshe tujue wapi panavuja”. Assume kama mgonjwa anayeumwa alikuwa na nyumba ya Siri mahali na alikuwa na mtoto pengine katika kulazwa kwake hospitali nyumba ndogo na mtoto nayo ikaja, watu ndo wakafunguka macho kweli kuumwa ni jambo baya lakini katika kuumwa kwake kuna jambo limefahamika.
Kama hakuna mvua nyumba za mabondeni na zenyewe zina raha yake full hewa, wale wa wanaokaa Jangwani huku Dar-es-Salaam wakati wa majira ya Kiangazi wana maisha mazuri kama wengine. Kwa wakazi wa maeneo korofi kama Sinza usiombe mvua ikanyesha ukajua maji yanavyojaa na kuziba barabara, kwa maeneo ya Kariakoo wakati wa mvua ndipo ambapo watu hufungulia chamber za maji taka. Ukitaka kuhamia kwenye nyumba mpya hamia wakati wa mvua ndipo utajua kuwa nyumba uliyohamia inavuja ama la. Kuna wakati ni heri mvua ikanyesha ukajua wapi pana vuja ili uweze kurekebisha.

Mvua inaponyesha na kugundua wapi panavuja kuna mambo matatu ya kufanya, kwanza kama tatizo lenyewe ni dogo unaweza kuziba kwa kumuita fundi ama ukaaamua kutengeneza mwenyewe sababu issue sio kubwa sana, jambo la pili ukigundua sehemu inavuja unataka kujua nini nimepelekea kuvuja kwa nyumba hapo sasa kunahitaji ukarabati wenye kugharimu kubomoa sehemu Fulani Fulani ili kuweza kuweka sawa pale panapovuja so hapo kuna gharama za fixing. Lakini njia ya tatu ni kuhama kabisa eneo hilo, kama kwa wakazi wa Jangwani ili kuepuka usumbufu wakati wa mvua ni kuhama maeneo yanayovuja sana na kuhamia maeneo salama.

Kuna watu ambao kwenye mahusiano yao ama ndoa zao kuna matatizo yanayohitaji tu marekebisho machache ili kuzuia tatizo lililopo, kuna watu wao wanahitaji aje fundi kabisa ndio wale unaowaona wanakwenda kwa washauri ama wazazi ama wasimamizi wa harusi zao nia na makusudi ni kusaidia kuzuia ndoa ama mahusiano kuharibika na kuna wale sasa ambao wao unaona wanaamua kabisa kuvunja ndoa zao na wengine kuachana nao kwa sababu gani uimara wa nyumba unapimwa wakati wa dhoruba.

Kwenye maisha kuna watu na taasisi zao inawezekana tukawa tunasema afadhari hili limetokea tumeujua ukweli, kuna mambo huwa yanatokea kama ajali, “coincidence” kwenye maisha kweli jambo linaweza kuwa ni baya lakini kupitia jambo hilo kuna ukweli mwingine uliokuwa umejificha huwa unajulikana. Unaweza kuta mtu ana watoto wa Siri amezaa na mtu mwingine kwenye Familia yake ya ndoa hawajui, siku akifa ndo wale watoto wanajulikana wakija mlilia mama ama baba yao. Unaweza kuta mdada kumbe alipataga mtoto zamani akaenda mficha kwa “bibi yake” huko kijijini na huku mjini mdada akaendelea na maisha yake, siku ikitokea Yule mtoto kule kijijini akaumwa ama akafa basi kuna jambo lingine huwalinatokea kwa kujulikana ni kama “Coincidence” Fulani ndo maana unasikia mtu “heri nimeujua ukweli”.

Katika mambo mengi sana yanayotokea kwenye maisha yetu kuna upande wa hasara na kuna upande wa kujifunza kile ambacho kinatokea. Pamoja na ubaya wa jambo kuna heri ya jambo hilo ndio maana katika msiba kuna Kufa Kufaana, lakini kuna mambo ambayo yanapelekea jambo lingine kufahamika kwa sababu ya tatizo lililotokea. Mvua ikinyesha tunajua wapi panavuja kama isingenyesha yamkini tusingefahamu lolote. Hujawai ona mwanaume kila siku simu yake iko mkononi siku hiyo ikatokea pengine ugonjwa ama kusahau simu nyumbani ndipo mkewe akaamua kuichukua simu hiyo na kukagua Hamad, anakutana na vitu vya ajabu, pengine ndipo anapogundua mume wake ni Shoga ama anauza madawa ya kulevya yapo mambo mengi sana yanayoonekana kama ni tatizo lakini kuna somo la kujifunza.
Kwenye maisha ya biashara unaweza kuta kila siku unapata hasara, kwa kupata hasara unaweza kujua hasara inatokana na nini. Hasara inakupa sababu ya kuboresha biashara yako. Heri ukapata hasara ukajua safari ya pili nini kilipelekea hasara mara ya kwanza. Ukijua wapi panavuja itakupa fursa ya kujiimarisha upya.

Kwenye mahusiano kuna watu wengi sana wanachukuaga maamuzi yasiyo sahihi kwa kugundua mtu wake kumbe anatabia Fulani. Wengi hutafuta suluhu ya kuhama badala ya kuangalia kama sehemu yenye tatizo inaweza rekebishika, ama inahitaji kubomolewa kwa maana ya kutoa maelekezo na njia mbadala badala ya kukimbilia kumuacha mtu. Assume mtu unayempenda kwa dhati ukagundua kumbe ana mtoto wan je ya ndoa, then wewe uka opt kuondoka na kumuacha utakuwa umejenga ama umebomoa? au unamuacha mtu sababu anatafuna vibaya ama akilala anakoroma na wewe hupendi wa kukoroma, heri umejua anakoroma ili uweze msaidia. Kuna wanawake hawapendi wanaume waongea kwa hasira, au wenye hasira wanatamani wanaume ambao ni reasonable hawawezi fanya kituko mbele za watu yaani hawawezi waabisha, kama watu hao hawajaoana mshukuru Mungu kuwa Heri Mvua imenyesha ukajua wapi panavuja, Kama Mtu wako sio mwaminifu na umegundua cha msingi usianze mtukana jiulize tu hii mvua inayoingia ndani imepitia wapi ili uzibe?. Unaweza ukawa kwenye mahusiano tu hata kwenye ndoa hujaingia siku ikatokea umemuudhi mpenzi wako ukashangaa anazira eti anasusa ana kasirika mpaka anavunja simu badala ya kumuacha na kumkimbia mshukuru Mungu kosa ulilolifanya limepelekea umejua tabia ya mpenzi wako, heri mvua ikanyesha ukajua wapi panavuja.

Jifunze kuelewa mambo kwa mlengo chanya, usiutazame sana mkono unaokuonesha mwezi ulipo ila tazama mwezi unaooneshwa. Hakuna kitu kinatesa duniani kama mtu akufanyie kitu ambacho hujui kwanini anakufanyia ama umefanyiwa, hakuna kitu kibaya kama ufukuzwe kazi halafu hujui kwanini umefukuzwa kazi, hakuna kitu kibaya kama hujui kwanini unapata hasara kwenye biashara, hakuna kitu kibaya kama Mchungaji washirika wake kuhama kanisa huku yeye hajui kwanini Washirika wanahama, vivyo hivyo kwenye mapenzi hakuna kitu kinachotesa kama ukampenda mtu sana then from nowhere akawa hakupendi tena unabaki kujiuliza maswali usiku mzima bila majibu, kuna watu wanakonda sababu ya kuwaza “why this happening to me”? kuna rafiki yangu alipelekwa kulazwa kabisa hospitali, kuna watu wanaombewa utadhani wanaumwa kumbe mapenzi yanatesa, mapenzi yana nguvu kuliko mauti.

Maisha ni changamoto jambo lolote unaloligundua kupitia “Coincidence” mshukuru Mungu badala ya kuanza kuanza kuchukua maamuzi sio, pengine kupitia kufukuzwa kazi ndo umegundua rafiki yako yuko tayari kujiua ili asiishi bila ajira,  BiBlia inasema “All thing(s) works for good”. Kama kupitia kitu Fulani au issue Fulani ndo umegundua kitu kingine basi mshukuru Mungu kwa kilichotokea sababu kimekuwezesha kujua kitu kingine. Kumtuhumu muhusika hata kosa utetezi kwa sababu moja ama nyingine. Heri Mvua ikanyesha ukajua wapi Panavuja ili uchukue hatua za marekebisho ama kuhama.

Tuko pamoja.

Papaa
0713 494110

Thursday, April 10, 2014

Exposed From Facebook........Mambo 7 Mwanaume atarajie Kupoteza anapoingia kwenye Mahusiano ama Ndoa


Marafiki Zangu Wanaotarajia Kuoa Wanaume hatuna Sehemu ya Kitchen Party Sie tunaendaga tu hivyo hivyo, tunaambiwa tusameheane, Tupendane na Kuheshimiana na mambo yanayofanana na hayo. Unapofikiria kuoa ama kuchumbia mtoto wa watu ama Kuwa na Serious Relationship kuna mambo mengi sana huwa yanatokea.

Zamani nilikuwa sijui kwanini Watu wengi sana baada ya kuoa hubadilika na wengine wanapoteza kile walichokuwa nacho kabla ya kuoa wengine hadi huduma zinakufa kwa sababu ya ndoa ukiacha sie wachache ambao baada ya kuoa ndio akili zinakuwa na afya zaidi na unaona mambo mengi ambayo ulidhani unajua kumbe haujui. Ndio maana juzi nilisema kwenye ndoa kuna mmoja amebahatika sasa unless uwe umebahatika utafurahia.
Kwa Wanaume Wenzangu Wote ambao Wanatarajia Kuingia Upande Huu Wajiandae Kwa Mambo 7 Kuyapoteza unapoingia katika Serious Relationship.

1. Marafiki Zako Wa Kike….Usitegemee Kabisa Ukishatangaza nia ya Kuoa utaendelea kuwa na marafiki wa jinsia ya kike kama zamani wale waliokuwa wanaku sms mara kwa mara, wale waliokuwa wanakusifia pale unapofanya vizuri watapungua, na humu Facebook kama ulikuwa unapata Comments 1000 au 6000 usitegemee tena usishangae kupata Comments 3-10 ni mabadiliko ya kawaida sana pale unapotangaza nia. Kabla ya Kutangaza Nia ukipost Picha Yako Facebook utashangaa ma Comment “You Look Wow”, “Handsome wa Ukweli”, “I Like Your Shirt”, “I Like Your Pause”. Ukitangaza Nia tu jua hata “Like” hautapata wengine watasema wanaogopa hawataeleweka vizuri na Mpenzi wako, kuna kuwa na adabu Fulani hivi lakini wengine Ukweli ni kwamba walikuwa wana matumaini sana na wewe.

Sababu nyingine pia ni Mpenzi wako ama mkeo hatakuwa na amani sana na baadhi ya marafiki zako wa Kike ulio nao, ajabu wewe mwenyewe hauna hata wazo la huyo mwanamke ila utashangaa tu unaambiwa “Sipendi Urafiki wako na Jack”. Kuna neno wanalitumia “I don’t feel Comfortable……” Ukishasikia tu hilo neno maana yake “STOP”. Ukimuuliza unamaanisha “Nisiwe Nachat “?atasema hapana “But am not Comfortable”

Wakaka Mjiandae haya ni mambo ya Kawaida Sana kwenye maisha kupoteza marafiki wa Kike ili Ubaki na Umpendae kuliko wote si ndio maana ulimchagua yeye.
2. Tegemea Kupoteza “Weekends” Zako. Ninaziita ‘zako” kwa sababu kabla ya kuwa na Relationship ama ndoa Ulikuwa na uwezo wa kujiamualia Weekend hii nalala, Weekend hii naenda movie, Weekend hii naenda Kulala kwa Prosper, Weekend hii naenda sijui Wapi. Kati ya vitu Wanawake nadhani karibu wote wanapenda ni kuwa na muda wa kutosha na Mpenzi wake. Tena sio uwepo tu mwili akili hazipo hapana,wengine wanatamani mtoke wote muende out na ukifika out sio uwe busy na simu yako haumpi nafasi, kumpa nafasi sio kukaa pembeni yake la hasha ni Ku-communicate. Wapenzi wengi sana Wanazungumza lakini hawa-communicate. Mwanamke anapokuwa na wewe anataka uache kila kitu kisha macho, masikio, na ufahamu uwe hapo, sio yeye anakuongelewa halafu wewe unajifanya Busy eti na Mpira. By the way hawako interested sana na story zinazokuhusu wewe anataka kusikia mambo yanayowahusu ‘nyie”. Wanawake wanamaswali ambayo wanaume wengi sana hatuna majibu unaweza shangaa uko ofisini na mpenzi wako anajua kabisa uko ofisini, ghafla unashangaa “sms” unaulizwa ‘Uko Wapi”? sasa wewe kwa kutokujua “Communication” unakurupuka tu kujibu “siii niko ofisini” hivi unadhani kwa akili zako za kawaida hajui uko ofisini??au unapoulizwa za Siku yako??jibu lake sio “Safi”, Sio “Poa”…….Jibu lazima liwe na attachments za kutosha. Wanawake huwa wanahitaji Muda na Wapenzi wao, sasa wewe usijifanye, “tunafatana fatana kama Kumbikumbi” yaani wao kufatana fatana ndo wanapenda na wao huwa wanashangaa sasa kama hutaki tufatane fatane kwanini unanioa?Usishangae kabisa Jumanne unaulizwa “Weekend Una ratiba gani”?sasa wewe badala ya ku-communicate, Una ropoka “Jamani leo Jumanne unauliza Jumamosi”?hahaha maana yake hapo “weekend ninakuhitaji”.

3. Kuchat Chat na Wadada, Kuwa na Muda na shughuli Zako Vinapotea. Sisi wanaume ni watu ambao kuna vitu wanawake huwa hawawezi kabisa kutuelewa hasa tunapokuwa kwenye mahusiano. Wanawake huwa wanashangaa sana Unawezaje kuwa na namba ya X wako. Wakati wao wakipata mpenzi mpya huwa wana delete hapo hapo. Ingawa zoezi hili lina madhara yake lakini ukweli ni kwamba wanaume wengi sana hupenda kuchat chat na wanawake. Ndoa nyingi sana zimekuwa na maugomvi pale mwanamke anaposhika simu ya mumewe amechat na wanawake kibao, au anakwenda facebook anashangaa mumewe ana marafiki wengi wa kike, mke anaenda kulala anashangaa mumewe ama mpenzi wake yuko busy na simu. Kuna wanaume ukweli ni kwamba wanapenda sana ku-Flirt yaani anaweza akawa anachat na mwanamke mambo ya mapenzi wakati hana hata wazo na huyo mwanamke. Nimekutana na issue nyingi sana za hivyo unaweza shangaa mpenzi wako anachat chat na mfua nguo wa nyumbani kwake ndio maana sio ajabu katika nyumba za kupanga za watu wengi wanaume ndio wanaokuwa na namba nyingi za wapangaji wa kike kuliko wanawake kuwa na za wanaume. Ukishakuwa kwenye mahusiano haya mambo sahau kabisa na kwa kadri unavyotaka kuchat chat mwanamke mwingine ndivyo ambavyo unaibua maswali kwa mpenzi wako wa kike utaulizwa tu swali ina maana huwezi pitisha siku bila kuwasiliana na “Chihiyo”??ili kuponya mahusiano yako basi huna budi kuwaepuka wengine na kuambatana nae huyo siku zote.


4. Kuwajibika Kwa Mpenzi Wako---Utii Pasipo shuruti…Ukiwa Single unaweza jiamulia mambo yako, unaweza jiamulia muda wa kurudi, unaweza jiamulia nini Uvae na nini Ule, wapi uende. Ukishakuwa kwenye mahusiano serious na pengine ukishakuwa umeoa ujue haupo huru tena ulishauza uhuru wako. Ukishakuwa kwenye mahusiano Mpenzi wako anatamani yeye kuwa wa kwanza kujua habari zako kuliko mtu mwingine yeyote. Kwenye saikolojia ya Wanawake wanaamini kwa kadri wanavyokuwa wa kwanza kujua habari zako hasa mpya ndivyo ambavyo wanakuwa wameshibwa kimapenzi. Hakuna kitu kibaya unasafiri kwenda Mwanza eti Mpenzi wako anaona facebook “Mwanza Moja”, ama umemwambia naenda Posta Mara moja kumbe ukapata appointment ukapita Mlimani City, ghafla mdogo wake kakuona Mcity akamtext dadake, "namuona shem amenenepa mbaya, hongera dada" nae anauliza “mmh umemuona wapi”?Yuko hapa Mcity anaongea na mdada mmoja hivi, ujue hadi hapo umenunua kesi, umeaga unaenda Posta, Kumbe umeenda Mcity kuonana na wanawake zako. Ukweli ni kwamba Yule mwanamke alikuwa anakupa deal la “Chomoza” ambalo ni faida yenu na mkeo lakini ujue hata utoe maelezo yepi kuna kitu hata kuelewa. Ulipokuwa Single ulikuwa hauwajibiki mahali ukishakuwa na mahusiano jua unawajibika kwa Mpenzi wako, anaweza asikuambie lakini ukweli ni kwamba anatamani Kuwa wa Kwanza kufahamu vitu vyako pengine kuliko Mama yako Mzazi. Hakuna kitu Kibaya Mpenzi wako wa kike anasikia kutoka kwa ndugu zako kuwa mmenunua kiwanja,anasikia kwa marafiki zako kuwa kumbe ulichukua mkopo bank. Sio kwamba wanatamani kujua ili Wakuzuie kufanya unachotaka kufanya lakini ukweli ni kwamba Wanatamani sana Wao kuwa sehemu ya moyo wako. Utalazimika kusema Yote kuliko mengine ukajifanya una ujasiri wa kumwambia ndugu zako kuliko yeye.


5. Uhuru Wako Wa Fedha Unapotea…Kati ya maeneo ambayo yameleta mzozo kwenye mahusiano ya watu wengi sana basi ni eneo la Mtonyo. Fedha zozote ambazo unakuwa nazo kabla ya Kuoa ni Zako siku ukioa hata account ikiwa na Milioni 10 ujue ni zenu. Kwa kuanza tu siku ya harusi zawadi za hela zinazotolewa sio zako mwanaume ni “zenu”. Mkeo anao Uhalali na uhuru wa kukuuliza kuhusu matumizi Yenu. Mkeo anao Uhalali wa Kuuliza Vyanzo Vyako Vyote Vya Fedha ulivyonavyo nawe kumwambia pasipo kumumunya maneno. Kama mtu anakupa mwili wake itakuwa makaratasi yako?Mwanaume ndiye Mtekelezaji wa majuku YOTE ya Nyumbani Unless itokee Mkeo atake kukusaidia, hata akiwa ana hela na unajua ana hela Mwanaume Ndiye anayewajibika KUTIMIZA mahitaji ya home pasipo mwambia “wewe hela sii unazo” Sio wajibu wake labda muwe mmekubaliana maana yeye ni Msaidizi, anasaidia pale ambapo umekwama. Hauna uhuru wa Kumkopesha mtu fedha pasipo idhini ya mpenzi wako wa kike. Hauna idhini ya kununua kiwanja ama kitu pasipo “kushauriana”. Kwa wale ambao wamebahatika Wanajua Mshahara wa Waume zao na Salary Slip wao ndio wanaozitunza, kwa wale wenzangu na mimi kazi zote za nje kuanzia u-Mc wife ndiye anayepokea advance kama mweka hazina na kuiweka anakojua yeye. Hakuna kitu kitamu kama Mpenzi wako ukampa fedha tu siku ukaamua yaani leo kazi zangu ya U-mc mwezi wa April hela yake yoote yako. Mwaka una miezi 12 kuna hasara gani Mpenzi wako akala fedha ya kazi za mikono yako za mwezi mmoja?


6. Your Identity Hupotea---Ukishaingia Kwenye mahusiano ujue sio tena wewe ila ni “nyie”. Kuna mambo ambayo umezoelea kuyafanya ukiwa Single ukishakuwa na mahusiano au mke ujue vinapotea. Muulize John Lissu ambaye alizoea kuwa shaghala maghala, lakini Wanawake wengi sana wanapenda Utaratibu hasa wa nyumba zao. Anataka kila kitu kiwe na “SPACE” anataka aweke maua yaonekane, aweke vikombe vionekane. Kabla ya kuoa nilikuwa napoteza muda mwingi sana kutafuta vitu vidogo vidogo kama Soksi, Sindano, Kiwi. Ukishakuwa na mahusiano suala la ‘wewe” linakufa na Umimi lazima ufe. Inawezekana umezoea Kulala bila kukoga, inawezekana wewe umezoea kurudia suruali na nguzo zingine hata mara 3 halafu unaona pouwa tu, mwingine amezoea kuingia na viatu mpaka chumbani. Kuna wanawake wengine unavulia viatu mlangoni ndani kuna ndala za kuvaa ndani sasa wewe mtoto pori kama mie unataka kujifanya “ndo nilivyozoea”, mwenzako amesafisha nyumba wewe unakuja na mabuti yako yenye matope kisa na mkasa wewe baba mwenye nyumba. Ukishakuwa na mahusiano Serious anza kujiandaa kupoteza vitu vingi sana ulivyozoea. Wanawake wanapenda waume zao wawe smart waonekane nadhifu.

7. UBINAFSI lazima Ufe….Kati ya mambo ambayo nadhani wanaume wengi sana wanatakiwa kuanza kujifiunza tangu utotoni ni uwezo wa kuwaza kuhusu feelings za wengine hasa jinsia ya kike. Pia uwezo wa kutoa fedha, muda pasipo kuwa na risala ndefu utadhani shirika la Mikopo. Unaweza kuta mnaenda kwenye sherehe mwanaume amepiga pamba ma bring bring ya kufa mtu sasa tazama mke wake amepiga gauni la Karume na Cheni za pale mwenge. Kila Saa unawaza “Mimi”, ama “Kwetu”, unakuta mwanaume anasimu kali Screen touch sasa katazame ya Mkewe kisa na mkasa “hawezi tumia” kwanini usimfundishe??Unaweza kuta mwanaume mwengine anatuma hela kwa mama yake wakati mkewe akitaka kuomba mpaka atume na maelezo, Jana sii nimekupa Laki 2 nipe “mchanganuo”. Kati ya Vitu ambavyo utarajie kuvizika ukiwa na Relationship basi ni “u-mimi”. Kunyamaziwa haimaanishi ndo uko sawa ila ujue “unavumiliwa”, Mpenzi wako akitaka kununua kitu mpaka aombe ila wewe ukitaka unaenda tu kutungua unayoitaka. Wewe ukijinunulia Vocha unaweka Buku 10 mpenzio akitaka Vocha unampunguzia BUKU. Wengine wakija kwa mbele za watu wanaweza toa ahadi kubwa kubwa mpaka wapenzi wao wanapatwa na butwaa “heee kumbe ana hela’?wengi wetu ni wabinafsi kupita maelezo mwingine mpaka kwenye kula unaweza kuta mume anawahi minofu minofu, sasa mko wawili tu unawahi minofu ili hizo zingine ale nani?unaweza kuta mwingine mmeenda out mpenzi wake akiagiza chakula anachotaka anaenda kusoma “bei” furaha yake kiwe na bei rahisi kuliko chake, cha mpenzi wake kikiwa na bei kuna kaukakasi kanamuingia utadhani ilipitishwa kwenye Rasimu ya Katiba Kuwa yeye ndo ale bei kubwa. Ukianza mahusiano jua tu Ubinafsi hauna nafasi.



Nikirudi Tena nakuja Kuandika……..Tabia 10 za Wanawake Ma-Single Zinazosababisha Kuchelewa Kuolewa (msijipe moyo wakati wa Bwana haujafika) Kuna mambo huwa mnabugi mbayaaa matokeo yake mnapotezewa mbaya. Unashangaa una qualities zote za Kiroho, Kifedha, Kielimu na Ufahamu still watu wanakuja wanakaa kidogo kisha haooooooooo.

Tuesday, April 8, 2014

Kanisa la Magomeni TAG laadhimisha Miaka 75 ya Kanisa la TAG kwa Kualika Washirika Wote Wa Zamani

siku ya Jumapili katika Kanisa la Magomeni TAG katika kusheherekea miaka 75 ya Kuanzishwa kanisa la TAG hapa Tanzania, iliandaliwa ibada ya Kihistoria kwa Mchungaji wa Kanisa hili Dastan Kanemba Kuandaa Ibada kwa kualika washirika wa Magomeni waliowahi kusali mahali hapo na kuwa na chakula cha pamoja.

Katika ibada hiyo ziliimbwa nyimbo za mwaka 47 wakati kanisa linaanza, watoto wa Sunday School ambao kwa sasa ni watu wazima walikumbushia enzi za utoto wao kisha aliyekuwa Mchungaji wa Kanisa hilo ambaye ndiye mwasisi Mchungaji Sasali alihubiri siku hiyo. Kisha chakula cha pamoja kiliandaliwa.

Akihubiri katika Ibada hiyo Mchungaji Sasali alisema Kanisa la TAG halitaweza kuvuna mavuno mengi iwapo kuna chuki kati ya mtu na mtu, kati ya kanisa na Kanisa, Yesu alipokufa alifanya kazi ya kuvunja "viambaza". Aliwataka washirika wa Kanisa hilo kuvunja viambaza vyote ambavyo yamkini watu bado wanavyo mioyoni ili kuweza kupiga hatua.
Sehemu Ya Umati Wa Waumini Waliokuwepo Kwenye Ibada
Ma Mc wa Event Ze Blogger Kushoto na Joseph Mwakibuti
Aliyekuwa Mchungaji Kiongozi wa Magomeni TAG pamoja na Mke wake Pastor Sasali akienda sawa katika Ibada hiyo
Pastor Matthew Sasali ambaye ni Mtoto wa Pili wa Mchungaji Sasali akifatilia Ibada kwa Umakini Mkubwa
Hapa Sijui Ilikuwa nini?
Mchungaji Kiongozi Wa Magomeni TAG Dastan Kanemba akitoa maelekezo Muhimu wakati wa Ibada
Ze Blogger akimpa Kisa Cha Zamani Sana Wakati Wa Kanisa hilo linaanza
Watu hawana Mbavu Ma-Mc wakiwa Kazini
Pastor Matthew Sasali akikumbushia Kinanda Enzi za Magomeni
Joel Sasali Uche wa Bongo akikamua Worship Siku ya Jumapili
Kitu Cha Cord...na Pastor Mathew Sasali
In His Presence
Ze Blogger akituma Vocal Wimbo wa Kuabudu
In His Presence...There is the Fullness Of Joy
Kitu Cha Sebene
Mtakatifu Mtakatifu Twakuita Mtakatifu Eeenh Yesu Wewe Mtakatifuuuu
Mchungaji Kiongozi wa Magomeni TAG Mch. Kanemba na Mke wake.
Mchungaji Sasali aliposimama kwenye madhabahu alipanda mama mmoja kupangusa kwa kitambaa chake miguu ya Mtumishi huyo
Mchungaji Sasa alikuwa na Mke wake Madhabahuni
Watoto wa Mchungaji Sasali
Mzee Mzima Pastor Sasali akihudumu siku ya Jumapili kwenye Ibada ya maadhimisho ya Miaka 75 ya TAG ngazi ya Kanisa la Mahali Pamoja
Pastor Sasali na Mama Sasali Wakiwaombe Watumishi Mch. Kanemba na Mke wake
Pastor Sasali na Pastor Kanemba wakifanya maombezi ya Washirika
Kwaya ya Mwaka 47 akiimba Katika Ibada, Hawa ndio waliokuwa Washirika Wa Mwanzoni Mwanzoni wakati Kanisa Linaanza
Vijana Waliofungishwa ndoa na Mchungaji Sasali wakitoa Sadaka Ya Shukrani






Papaa On Tuesday......Ganda La Muwa La Jana Chungu Kaona Kivuno

Baada ya Mapumziko ya Kukumbuka mmoja wa Waasisi wa Taifa Letu Mhe. Karume siku ya jana nimatumaini yangu ya kuwa tu wazima na tunaendelea vema na shughuli zetu za kila siku za kujiendeleza sisi wenyewe na Taifa letu kwa ujumla. 

Ikiwa na ni Jumanne yetu ya kwanza katika robo ya pili ya mwaka 2014. Maana miezi mitatu ishakatika tumeanza robo ya pili chekecha ubongo mapema.Siku ya leo nimeona ni vema tukakumbushana Papaa On Tuesday hii niliyoandika miaka miwili iliyopita kuhusu  mambo yanayoweza kutupa fursa ya kuweza kusonga mbele katika mwaka 2014. Leo kwenye Papaa On Tuesday (POT) nimeandika msemo wa Kiswahili ambao kwa wengine inaweza kupata utata wa matuzimi ya lugha yetu tukufu ya Kiswahili.

Msemo wa Kiswahili uliotumika una maana ya kwamba, ganda la muwa ambalo kwa kawaida halina matumizi tena ya kawaida kwa mwanadamu na ambalo limeshaanza kukauka, basi mdudu chungu ambaye anakula maganda hayo kwake hugeuka kuwa sherehe kubwa sana sababu ndo chakula chake, sababu hiyo ganda la muwa la jana kwa chungu kwake ni mavuno ambayo yanamsahaulisha kabisa kuwa muwa watu hawali kila siku. Lazima tutajiuliza msemo huu maana yake ni nini?

Watu wengi wanatabia ya kama ya huyu mdudu chungu. Mtu asiyezoea kuwa na kitu siku akipata hata kitu kama ni duni au hafifu ama dhaifu au hata kama ni kidogo, hushangilia na kukimaliza chote ama kukitumia chote kikaisha akisahau kuwa kesho maisha yanaendelea. Ndio maana katika kizazi chetu unakuta mtu kila mwezi ana madeni kila siku anadaiwa yeye na kuna wakati hata yeye mwenyewe anayedaiwa sio kwamba hata yeye mwenyewe anapenda ila anajikuta tu yuko mule mule ni kwamba amefungwa kwenye maisha fulani amejikuta anapiga mark time. Anadhani akipata laki moja shida itaisha anagaundua akipata laki moja pia haimtoshi

siku moja tukiwa kwenye program ya “Intellectuals Meeting” rafiki yangu na Boss wangu Eng. Andrew Mnzava alikuwa anafundisha akauliza swali “Kama leo ukisimamishwa kazi kwa muda gani utaweza kuishi maisha yale yale uliyokuwa unaishi?je miezi miwili, mitatu?”. Wengi wetu tunaishi hivi tulivyo kutokana na vipato vyetu vya sasa na vyanzo vyetu vya fedha vilivyopo umewahi kuwaza hivi siku vyanzo vyote vikisimama kuleta fedha kwa muda wa mwezi mmoja nitaweza kuishi mjini?We unadhani kwanini Wastaafu huwa wanakufa haraka mara baada ya kustaafu?hawa watu walizoea mifumo ya fedha wakiwa maofisini ambapo wakistaafu hiyo mifumo inakuwa haileti tena fedha kwao.
Si kweli kwamba watu huwa hawapati fedha katika maisha yao kila siku watu wanaingiza fedha lakini tumekuwa kama Chungu aliyepata fundo la muwa wa jana. Mtu anapata hela na alikuwa amepanga kabisa kununua kitu Fulani cha maana katika kuleta maendeleo katika maisha yako ajabu mtu anapata fedha anaenda kununua kitu kingine kabisa. Kuna watu fedha zao zinaishia kwenye kuvaa, kula na kujipodoa na katika mambo ya kifahari yasiyo na sababu eti aonekane mambo safi, huku ni kufurahia ganda la muwa la jana, masikini akipata “makalio” hulia mbwata, kwanini unapenda uonekane vile ambavyo sivyo ulivyo?

Wengi wetu tunatosheka na afadhari kwenye maisha hatupendi kwenda extra mile, unahangaika kutafuta fedha pengine kwa mshahara ama biashara mwishi wa siku hakuna jambo la maendeleo unalolifanya unajisikia raha ukionekana smart, unanukia na nadhifu wakati vyanzo vyako vya fedha vikisimama kwa mwezi mmoja wengi watageuka kuwa majambazi, Malaya na hata matapeli.

Tujijengee tabia ya kujiwekea akiba katika kile kidogo tunachopata, tujifunze kufanya ujasiriamali, tujifunze kufanya biashara, usipende watu wakufanyie kila kitu, kuwalalamikia watu kuwa hawakusaidii katika maisha haitatatua tatizo ulilonalo, kazi haitafutwi kwa kulala na kulalamika, mafanikio hayaji tu kwa kuomba na kuombewa, unao waona leo wana maendeleo kuna siku walijinyima kwa ajili ya maendeleo yao waliwahi fanya opportunity cost , wakaamua kuacha kununua Prado wakanunua Colona ili waanzishe duka, walijinyima kuvaa kwa ufahari ili wajenge flemu za maduka, wewe unataka usaidiwe huku ukiwa unaangalia TV nyumbani kwako, mtu mwingine aungue jua kwa ajili yako.

Huu mwaka unapoendelea jipange sawa sawa, kila fedha inayopita mikononi mwako weka akiba, akiba haiozi, anza na biashara ndogo mahali Mungu ataiona na kuikuza, achana na akili za masikini “tumia fedha ili ikuzoee” fedha huwa haima tabia ya kuzoea watu, ukifanyika mtumwa wa fedha unaanza kuwa mwendawazimu wa fedha hizo, jichunguze sana unafanya nini na fedha inayokuja mikononi mwako. Anza kuwazaa kufanya kitu usitosheke kuwa mama wa nyumbani ama baba wa nyumbani, siku utakayochoka utaichukia hata TV yako unayoipenda sana, siku ukichoka na maisha uliyonayo ndipo utakapoanza kupiga hatua kwenye maisha yako.

Ganda la Muwa wa jana usikufanye usikie utamu mpaka kesho na kusahau maisha yanaendelea kuwa makini na kila unachofanya ili uweze kuvuka katika maisha haya.Usitosheke na afadhari komaa na maisha kila iitwapo leo.

Think Differently Make a Difference.
Papaa
0713 494110.
Related Posts Plugin for WordPress, Blogger...